நபி (ஸல்) அவர்களுக்கு அளிக்கவேண்டிய உரிமைகளில் ஒன்றான ஸலவாத்தையும், ஸலாமையும் அவர்கள் மீது கூற வேண்டும் என அல்லாஹ் கட்டளையிடுகிறான்.
நிச்சயமாக அல்லாஹ்வும், அவனுடைய மலக்குகளும் நபியின் மீது ஸலவாத்து கூறுகிறார்கள். (ஆகவே விசுவாசிகளே) நீங்கள் அவர் மீது ஸலவாத்துச் சொல்லுங்கள், ஸலாமும் கூறுங்கள். (33:56)
அல்லாஹ் நபியின் மீது ஸலவாத் கூறுகிறான் என்பது மலக்குகளிடம் நபி (ஸல்) அவர்களை புகழ்ந்து கூறுவதையும், மலக்குகள் ஸலவாத் கூறுவதென்பது நபி (ஸல்) அவர்களுக்காக துஆ செய்வதையும், மனிதர்கள் ஸலவாத் கூறுவதென்பது நபி (ஸல்) அவர்களுக்காக பாவமன்னிப்பைத் தேடுவதையும் குறிக்கிறது. ( அறிவிப்பாளர்: அபுல் ஆலியா (ரலி), புஹாரி)
அல்லாஹ் இந்த வசனத்தில் தனது அடியாரும் நபியுமான முஹம்மத் (ஸல்) அவர்களின் அந்தஸ்தை உயர்ந்த இடத்தில் தனக்கு நெருக்கமான மலக்குகளிடம் புகழ்ந்து கூறுகிறான். மேலும் மலக்குகளும் அவர்களுக்காக துஆ, செய்கிறார்கள். இப்பூமியில் உள்ளவர்களும் நபி (ஸல்) அவர்கள் மீது ஸலவாத்தும், ஸலாமும் கூற வேண்டும் என அல்லாஹ் கட்டளையிடுகிறான்.
ஆக, இவ்வாறாக அகிலமெங்கும் உள்ளவர்கள் ஒன்றிணைந்து நபி (ஸல்) அவர்களைப் புகழ வேண்டும் என்கிறான்.
ஸலாமைக் கூறுங்கள் என்றால், இஸ்லாமிய முறையில் ஸலாமை கூறுங்கள் என்று பொருள். நபி (ஸல்) அவர்கள் மீது ஸலவாத்தைக் கூறுவதாக இருந்தால் ஸலவாத்தையும், ஸலாமையும் தனித்தனியாக கூறாமல் இணைத்தே கூற வேண்டும். ஏனெனில் அல்லாஹ் இந்த இரண்டையும் இணைத்தே கூற வேண்டும் என்கிறான்.
நபி (ஸல்) அவர்கள் மீது ஸலவாத் கூறும் இடங்களை கவனித்தால் அவற்றில் சில இடங்களில் கண்டிப்பாக கூற வேண்டும் என்ற பொருளிலும், சில இடங்களில் வலியுறுத்தி சொல்லப்பட்ட சுன்னத் என்ற பொருளிலும் உள்ளது.
ஒரு முறை ஸலவாத் கூறுபவர் மீது அல்லாஹ் பத்து அருளை பொழிவது,
துஆக்களை கேட்பதற்கு முன் ஸலவாத் கூறுவதால் அந்த துஆக்கள் அங்கீகரிக்கப்படும் என்று ஆதரவு கொள்வது,
நபி (ஸல்) அவர்களின் வஸீலாவை அல்லாஹ்விடம் கேட்கும்போது ஸலவாத்தையும் இணைத்தால் அது நபி (ஸல்) அவர்களின் பரிந்துரைக்கு காரணமாக அமையும் என்பது,
பாவங்கள் மன்னிக்கப்படுவதற்கு காரணமாக அமையும் என்பது,
நபி (ஸல்) அவர்களின் மீது ஸலவாத்தும், ஸலாமும் கூறுபவருக்கு நபி (ஸல்) அவர்களும் பதில் அளிக்கிறார்கள். என்பது ஆகிய பல பலன்கள் ஸலவாத் கூறுவதால் ஏற்படுகின்றன எனக் கூறுகிறார்கள்.