ٱدْعُ إِلَىٰ سَبِيلِ رَبِّكَ بِٱلْحِكْمَةِ وَٱلْمَوْعِظَةِ ٱلْحَسَنَةِ ۖ
“(நபியே!) நீங்கள் (மனிதர்களை) நளினமாகவும், அழகான நல்லுரையைக் கொண்டுமே உங்கள் இறைவனின் வழியை நோக்கி அழைப்பீராக!”... (16: 125) என்று அல்லாஹ் கூறுகின்றான்.
(م) عَنْ أَبِي هُرَيْرَةَ: أَنَّ رَسُولَ اللهِ صلّى الله عليه وسلّم قَالَ: (مَنْ دَعَا إِلَى هُدًى، كَانَ لَهُ مِنَ الأَجْرِ مِثْلُ أُجُورِ مَنْ تَبِعَهُ، لاَ يَنْقُصُ ذَلِكَ مِنْ أُجُورِهِمْ شَيْئاً، وَمَنْ دَعَا إِلَى ضَلاَلَةٍ، كانَ عَلَيْهِ مِنَ الإِثْمِ مِثْلُ آثَامِ مَنْ تَبِعَهُ، لاَ يَنْقُصُ ذَلِكَ مِنْ آثَامِهِمْ شَيْئاً .)
838 அபூஹுரைரா ரளியல்லாஹு அன்ஹு கூறியதாவது:
“(மக்களை) நல்வழிக்கு அழைத்தவருக்கு, அவரைப் பின்தொடர்ந்தவர்களின் நன்மைகளைப் போன்றது உண்டு. அது அ(வ்வாறு பின்தொடர்ந்த)வர்களின் நன்மையில் எதையும் குறைத்துவிடாது. தவறான வழிக்கு மக்களை அழைத்தவருக்கு, அவரைப் பின்தொடர்ந்த வர்களுக்குரிய பாவங்களைப் போன்றது உண்டு. அது அவர்களது பாவத்தில் எதையும் குறைத்துவிடாது” என்று அல்லாஹ்வின் தூதர் ஸல்லல்லாஹு அலைஹி வஸல்லம் கூறினார்கள். (முஸ்லிம்: 2674)
நூல் : மஆலிமுஸ் ஸுன்னா 838
--------------
விளக்கம் :
மேலே உள்ள குர் ஆன் வசனம் 16 :125 யில் உயர்ந்தோன் அல்லாஹ் , மக்களிடம் அறிவார்ந்த மெய்ப் பொருளும் அழகான அறிவுரையும் கூறி இறைவழிக்கு அழைக்குமாறு தன் தூதர் ( ஸல் ) அவர்களுக்கு ஆணையிடுகின்றான்.
இதில் ‘அறிவார்ந்த மெய்ப்பொருள் ‘( அல்ஹிக்மத் ) என்பது, நபி ( ஸல் ) அவர்களுக்கு அல்லாஹ் அருளிய இவ்வேதத்தையும் ,( வேதத்திற்கு விளக்கமான ) நபிவழியையும் குறிக்கும்; ‘அழகான அறிவுரை ‘ ( அல்மவ்இழத்துல் ஹசனா ) என்பது,( முற்கால ) மக்களுக்கு நேர்ந்த படிப்பினைக்குரிய நிகழ்வுகளைக் குறிக்கும் ;
அல்லாஹ்வின் தண்டனை குறித்து மக்களை விழிப்படையச் செய்வதற்காக அந்தப் படிப்பினைகளை நபியவர்கள் நினைவூட்ட வேண்டும் என அல்லாஹ் ஆணையிடுகின்றான்.என்று விரிவுரையாளர் இப்னு ஜரீர் ( ரஹ் ) அவர்கள் தெரிவித்துள்ளார்கள். ( பார்க்க இப்னு கஸீர் )