அல்லாஹ்வை அஞ்சி அவனுடைய தூதர் நபி(ஸல்) அவர்களை முன் மாதிரியாகக் கொண்டு வாழ்ந்து ஈடேற்றம் பெறுவதுவே ஒவ்வொரு முஸ்லிமுடையவும் குறியாக - இலட்சியமாக இருத்தல் வேண்டும். முஸ்லிம்கள் எனக் கூறிக் கொண்டு, அல்லாஹ்வும், அவனுடைய தூதரும் காட்டித் தராத ஷைத்தானுடைய வழிகேட்டில் சிக்கித் தவிக்கின்றவர்களையும் நாம் காண்கிறோம். அத்தகைய வழிகேடுகளுள் தலையாயவைகளாகத் திகழ்வன ஜோதிடம் கேட்பது, குறிபார்ப்பது, சகுனம் பார்ப்பது முதலியவையாகும்.
நமது நம்பிக்கையும் பொறுப்பும்:
மனிதன் தனக்கும், தன்னைச் சேர்ந்தவர்களுக்கும், நன்மையையே நாடும் இயல்புடையவன். அதுபோலவே, தீமை நிகழ்ந்து விடக்கூடாது என்பதிலும் குறியாயிருப்பவன் அவன். நன்மையை ஆக்கிக் கொள்ளவும், தீமையைப் போக்கிக் கொள்ளவும் மார்க்கம் அனுமதித்துள்ள வழிகளில் செயல்பட நாம் கடமைப்பட்டுள்ளோம். எல்லாவற்றுக்கும் மேலாக, நன்மையோ தீமையோ அல்லாஹ் நிர்ணயித்துள்ளவாறுதான் நிகழும் எனும் உறுதிப்பாட்டை ஈமானின் அம்சமாக ஏற்றுக் கொண்டுள்ளமை நமது தனிச்சிறப்பாகும். இந்த நம்பிக்கையின் அடிப்படையில், கடந்த காலத்திலிருந்து படிப்பினை பெற்று நிகழ்கால வாழ்க்கையை அல்லாஹ்வுக்குப் பொருத்தாமன வகையில் அமைத்துக் கொள்ள வேண்டியது நம்முடைய பொறுப்பாகும்.
மறைக்கப்பட்ட மறுமை ஞானம் :-
வருங்காலத்தைப் பற்றிய ஞானம் மனிதர்களுக்கு வழங்கப்படவில்லை. அடுத்த கணம் என்பது தற்போது தொடங்கி கியாமநாள் வரையிலுமுள்ள காலமாகிய வருங்காலத்தைப் பற்றிய முழு ஞானமும் அல்லஹ்வுக்கே உரியதாகும். நபி(ஸல்) அவர்கள் மனிதர்களுக்கு கியாமநாளைப் பற்றி எச்சரிக்கை செய்தார்கள். இதைக் கேட்டவர்கள், 'நீர் அல்லாஹ்வினுடைய தூதர் என்பது உண்மையானால் அந்த கியாம நாள் எப்போது வரும் என்பதைக் கூற முடியுமா?' என நபி (ஸல்) அவர்களிடம் கேட்டனர். அதற்கு நபி(ஸல்) அவர்கள், 'மறுமை நாள் பற்றிய ஞானம் எனக்குக் கிடையாது. அது அல்லாஹ்விடமே உள்ளது. நான் உங்களுக்கு அச்சமூட்டி, எச்சரிக்கை செய்பவனாகவே இருக்கிறேன்' எனக் கூறினார்கள். இதை அறிவிக்கக் கூடிய ஏராளமான வசனங்கள் அருள்மறை குர்ஆனில் உள்ளன. (பார்க்க அத்தியாயம் 79 ஸூரத்துன் நாஜியாத் - 43, 44, 45, 46 ஆம் வசனங்கள்).
நாளை நடப்பதே நாயனே அறிவான். கியாம நாள்பற்றிய ஞானம் மட்டுமல்ல. அடுத்த கனம் அல்லது நாளைய தினம் என்ன நிகழும் என்பது பற்றிய மறைவான ஞானமும் அல்லாஹ் ஒருவனுக்கு மட்டுமே உரியதாகும். எதிர்காலத்தை அறிந்திருத்தலாகிய அல்லாஹ்வுடைய இத்தனியாற்றலில் வேறு எவருக்கேனும் பங்கு இருக்கிறது என எண்ணுவதும், செயல்படுவதும் அல்லாஹ்வுக்கு இணைவைத்தல் என்னும் மா பாவத்தின் பால் மனிதனைத் தள்ளி விடக்கூடியதாகும்.
வல்லோன் வழங்கிய முன்னுணர் ஞானம்:
இறைவனுடைய படைப்புகளிளெல்லாம் மகோன்னத படைப்பாகிய நபி(ஸல்) அவர்களுக்குக் கூட எதிர்காலத்தைப் பற்றிய முழு ஞானமும் இருந்ததில்லை. ஒரு சில சந்தர்ப்பங்களில் நபி (ஸல்) அவர்கள், வருங்காலத்தில் இன்னின்னவாறு நிகழும் என்பதாக முன்னறிவிப்பு செய்துள்ளார்கள். இவை அல்லாஹ்வால் நபி(ஸல்) அவர்களுக்குக் பிரத்யேகமாக அறிவுறுத்தப்பட்டவையாகும். இவ்வாறு அறிவுறுத்தப்பட்டவைத் தவிர வேறு எதனையும் நபி(ஸல்) அவர்கள் அறிந்திருக்கவில்லை.
'நான் (இறைவனால் அனுப்பப்பட்ட) தூதர்களில் நூதனமானவன் அல்லன்: மேலும் என் சம்பந்தமாகவும் உங்கள் சம்பந்தமாகவும் (வருங்காலத்தில்) யாது செய்யப்படும் என்பதை நான் அறியேன்: எனக்கு வஹீ (மூலம்) அறிவிக்கப்படுவதைத் தவிர (வேறெதையும்) நான் பின்பற்றுவதில்லை. மேலும் நான் தெளிவாக அச்சமூட்டி எச்சரிக்கைச் செய்பவனேயல்லாமல் (வேறு ஒருவனாக) இல்லை என்று (நபியே) நீர் கூறுவீராக!' எனத் திருமறை வசனம் இதனைத் தெளிவாக உணர்த்துகின்றது.
நல்லதும் தீயதும் இறை நாட்டமே!:
நபி(ஸல்) அவர்களுக்கு அல்லாஹ்வினால் அறிவித்துக் கொடுக்கப்படாத நிலையிலுங்கூட தாமாகவே வருங்காலத்தைப் பற்றி அறியக்கூடிய முன்னுணர் ஞானம் உண்டு என்பாரும் உளர். இத்தகையவர்கள் சந்தேகத்துக்கிடமின்றி உணர்ந்து கொள்வதற்காக அல்லாஹ்வின் மற்றொரு திருவசனமும் அமைந்துள்ளது:
(நபியே!) நீர் கூறும்: 'அல்;லாஹ் நாடினாலன்றி நான் எனக்கே யாதொரு நன்மையோ அல்லது தீமையோ செய்து கொள்ள சக்தி இல்லாதவன்: மறைந்திருப்பவற்றை நான் அறிபவனாக இருந்தால் நன்மைகளை அதிகமாகத் தேடிக் கொண்டிருப்பேன், (அந்நிலையில் எவ்விதமான) தீங்கும் என்னைத் தீண்டியிராது - நம்பிக்கை கொள்ளும் மக்களுக்கு நான் அச்சமூட்டி எச்சரிக்கை செய்பவனும், நன்மாராயம் கூறுபவனுமேயன்றி வேறில்லை. (அத்தியாயம் 7 ஸூரத்துல் அஃராப் - 188வது வசனம்)
நபி(ஸல்) அவர்களுடைய வாழ்க்கை வரலாற்றை மேலோட்டமாகப் பார்ப்பவர்கள்கூட நபி(ஸல்) அவர்களுடைய வாழ்வில் எந்த அளவுக்கு அவர்கள் சோதனைகளையும், வேதனைகளையும் எதிர்கொண்டார்கள் என்பதை அறிந்து கொள்ள முடியும்.
நாளும் கோளும் நம்மவர்க்கில்லை:
நாளும், கோளும் நட்சத்திரங்களின் நிலை மாற்றமும் ஒருவனுடைய வருங்காலத்தை நிர்ணயிக்கின்றன என நம்புபவர்களை நாம் பார்க்கின்றோம்.
'அவனுக்குக் கிரகம் சரியில்லை. இது செவ்வாய்க்கிரகம். அது ஏழரை நாட்டுச் சனி..' என்றெல்லாம் பிதற்றித் திரியும் முஸ்லிம்களும்(?) இருக்கின்றார்கள். நபி(ஸல்) அவர்களுடைய அருமைக் குழந்தை இப்ராஹிம்(ரலி) மரணமடைந்தபோது மக்காவில் சூரியகிரகணம் சம்பவித்தது. பகல் இரவாக இருண்டு விட்டது. நபி(ஸல்) அவர்கள் மகனை இழந்து வருந்துகின்றமையால் அல்லாஹ்வின் துக்கத்தை இச்சம்பவம் காண்பிக்கிறது என்பதாக ஒரு சில நபித்தோழர்கள் கூறினர். இந்தத் துன்பம் மேலிட்ட நிலையிலும் கூட நபி(ஸல்) அவர்கள் சூரிய கிரஹணத்திற்குப் பொய்யாகவும், கற்பனையாகவும் காரணம் கற்பித்தத் தம்முடைய தோழர்களை வன்மையாகக் கண்டித்தார்கள். கோள்கள், கிரகங்களின் சஞ்சரிப்புக்கும், தனிமனிதருடைய இன்ப, துன்பத்திற்கும் தொடர்பில்லை என்பதை அந்தத் துன்ப உணர்வு சூழ்ந்த நிலையிலும் நபி(ஸல்) அவர்கள் அறிவு ரீதியாக நமக்குத் தெளிவாக்கி விட்டுச் சென்றுள்ளார்கள். (ஹதீஸின் கருத்து: ஹதீஸ் நூல்: புகாரீ).
குறிகாரனும் பைத்தியக்காரனும்:
தான் எதைப்பற்றி அறிந்திருக்கவில்லையோ அதைப்பற்றியெல்லாம் தனக்குத் தெரிந்தது போல உளறுவது பைத்தியக்காரனுடைய இயல்பாகும். இவனோ புத்தி, பேதலித்த நிலையில் தன் வயமிழந்து இப்படிப் புலம்புகின்றான். இவ்வாறன்றி, தன்வயமழிக்காத நிலையில் சுயநினைவுடனேயே, தான், அறியாத வருங்காலத்தைப் பற்றிய ஞானமெல்லாம் தனக்கிருப்பதாகக் கூறிக்கொள்கிறான் குறிகாரன்.
நபி(ஸல்) அவர்கள் அல்லாஹ்வின் தூதுரைகளை எடுத்தியம்பும்போது, அவர்களைப் பார்த்து, பைத்தியம் என்றும், குறிகாரர் என்றும் இழித்துரைத்தனர் காபிர்கள். அதை மறுத்துரைப்பதாகப் பின் வரும் வசனம் இறங்கியது.
'எனவே, (நபியே! நீர் மக்களுக்கு நல்லுபதேசத்தால்) நினைவுறுத்திக் கொண்டிருப்பீராக! உம்முடைய இறைவனின் அருளால், நீர் குறிகாரரும் அல்லர்! பைத்தியக்காரரும் அல்லர்.' (அத்தியாயம் 52 ஸூரத்துத்தூர் 29வது வசனம்).
குறிகாரர்கள் குதறப்படுவர் :-
நபி(ஸல்) அவர்கள் வாயிலாக அல்லாஹ் அறிவித்திடும் வார்த்தைகள் ஒரு குறிகாரனுடைய வார்த்தைகள் அல்ல. குறிகாரனோ, மனம் போன போக்கில் வருங்காலத்தைப் பற்றிக் கற்பனை செய்து பொய்யானவற்றை உளறக்கூடியவனாக இருக்கின்றான். இக்குறிகாரனைப்போல நபி(ஸல்) அவர்கள் மறை ஞானத்தின் மீது கற்பனை செய்து பொய்யுரைப்பாரானால், அவர் மிகக் கடுமையாகவும் கொடுமையாகவும் தண்டிக்கப்பட்டு விடுவார் என்பதாக இறைவன் பலமாக எச்சரிக்கிறான்.
'(இது) ஒரு குறிகாரனின் சொல்லுமன்று. (எனினும்) நீங்கள் சொற்பமாகவே (இதை நினைந்து) நல்லறிவு பெறுகிறீர்கள். அகிலத்தாருக்கெல்லாம் இவைறனிடமிருந்து (இது) இறக்கியருளப்பட்டதாகும். அன்றியும், நம்மீது சொற்களில் சிலவற்றை இட்டுக் கட்டிக் கூறியிருப்பாரானால் - அவருடைய வலக்கையை நாம் பற்றிப் பிடித்துக் கொண்டு, பின்னர் அவருடைய நாடி நரம்பை நாம் தரித்திருப்போம். அன்றியும், உங்களில் எவரும் (நாம்) அ(வ்வாறு செய்வ)தைத் தடுப்பவர்களில்லை. ஆகவே, நிச்சயமாக அது (குர்ஆன்) பயபக்தியுடையவர்களுக்கு நல்லுபதேசமாகும். ஆயினும், (அதைப்) பொய்ப்பிப்பவர்களும் உங்களில் இருக்கின்றார்கள் என்பதை நிச்சயமாக நாம் அறிவோம்.' (அத்தியாயம் 69 ஸூரத்துல் ஹாஃக்ஃகா - 42முதல் 49வரையிலான வசனங்கள்).
இவ்சனங்கள் மூலம் குறிகாரர்களுடைய சொல்லுக்கு எத்தகைய கடுந்தண்டனை காத்திருக்கிறது என்பதை, நபி(ஸல்) அவர்களுக்குக் கூறுவது போல நமக்கு எச்சரிக்கை விடுக்கின்றான். இறைவன், இதிலிருந்து எவர் நல்லுபதேசம் பெறுகின்றாரோ, அவர் குறிகாரனிடம் செல்லுவதை விட்டும், ஜாதகம் பார்த்தல், ஜோதிடம் கேட்டல், சகுனம் - முகூர்த்தம் கணித்தல் முதலியவற்றை விட்டும் தம்மைத் தற்காத்துக் கொள்ளக் கடமை பட்டுள்ளார்.
பொய்யாக்கித் திரிபவர்கள் :-
ஈமான் கொண்ட முஸ்லிம்கள் எனக் கூறிக்கொண்டு இந்த இறைவசனங்களை எல்லாம் பொய்யாக்கித் திரிபவர்களும் இருப்பார்கள் என்பதை இறைவனே சுட்டிக் காட்டியுள்ளான். இந்த நிலைமையை இன்றும் நாம் கண்கூடாகக் காணுகின்றோம். குழந்தை பிறந்தவுடனேயே ஜாதகம் கணிப்பதற்கு - குறிப்பு எழுதுவதற்கு - படிப்பதற்கு - வேலை தேடுவதற்கு - வெளிநாடு செல்வதற்கு - மாடு வாங்குவதற்கு - சொத்து முடிப்பதற்கு - திருமணப் பொருத்தம் பார்ப்பதற்கு - பிள்ளை பிறப்பதற்கு - எவ்வளவு காலம் வாழ்வான் எனத் தெரிவதற்கு - அமாவாசை - பௌர்ணமி - ராகுகாலம் - எமகண்டம் பார்த்து நல்ல நாளும் நேரமும் குறித்து மங்கள காரியம் செய்வதற்கு.. இப்படியாக எடுத்ததற்கெல்லாம் ஜோதிடனையும் குறிகாரனையும் தேடி ஓடும் அபலை முஸ்லிம்கள் ஏராளம்.. ஏராளம்.
தனக்கு வரும் தீங்கையேத் தடுக்க முடியாதவன் குறிகாரன் :-
தென்னை மரத்தடியிலிருந்து கொண்டு எதிரிலிருப்பவனுடைய வருங்காலத்தைப் பற்றிச் சொல்லிக் கொண்டிருந்தானாம் ஒரு குறிகாரன். அம்மரத்திலிருந்து தேங்காய் ஒன்று அந்தக் குறிகாரனுடைய தலையிலேயே விழுந்து அவன் அந்த இடத்திலேயே செத்து மடிந்தானாம். இப்படி ஒரு செய்தி நாளிதழ்களில் வெளியாகியிருந்தது.
ஆக, தமக்கே நன்மையோ தீமையையோ தாமாக செய்து கொள்வதற்கு ஆற்றலற்ற இம்மனிதர்கள், பிறருக்கு நிகழவிருக்கின்றவைகளைத் துல்லியமாக எடுத்துரைக்கிறார்களாம். இவர்கள் பின்னாலே பகுத்தறிவு மார்க்கத்தை ஏற்றுக் கொண்டவர்களும் செல்வது வேடிக்கையாகும்.
விலைக்கு வாங்கும் நிம்மதி குறைவு:
ஜோதிடத்தில் நம்பிக்கை கொள்ளுவது அறிவு ரீதியாக நினைத்துப் பார்த்தால் கூட எவ்வளவு பேதமையானதாக இருக்கிறது? இத்தகைய குறிபார்த்தல், ஜாதகம் கணித்தல் முதலிய ஷைத்தானியத்தன செயல்களினால் தனி மனிதனுடைய நிம்மதி குலைவதோடு, குடும்பத்தில் பிணக்குகள் சண்டை சச்சரவுகள் ஏற்படுவதையும் அன்றாடம் அறிகிறோம். 'இன்ன நட்சத்திரத்தில் இந்தக் குழந்தை பிறந்துள்ளது. இது வாழ்ந்தால் இன்ன தீங்கு நேரும். எனவே யாருக்கும் தெரியாமல் கொன்று விடுங்கள்' எனக் கூறும் குறிகாரனுடைய சொல்லுக்குப் பாமரர்கள் மட்டுமல்ல, படித்தவர்கள் கூடப் பலியாகிப் போகின்றனர். 'இன்னாருடைய ஜாதக பலன்தான் இத்தீமைகளுக்கெல்லாம் காரணம்' எனக் குறிகாரன் சொன்னதை நம்பி, அத்தகையவர்களை வேண்டா வெறுப்பாக, நாயினும் கீழாகக் குடும்பங்களிலும் பாவிக்கத் தொடங்குகின்றனர். ஜோதினடோடு, அரை நிர்வாண நிலையில் கன்னிப் பெண்ணைத் தனித்திருக்கச் செய்து, புதையல் எடுக்கிற ஆசையில் முழுக் குடும்பமுமே புதைந்து போன சம்பவங்களும் இச்சமுதாயத்தில் உண்டு.
ஹராம் ஹராம்தான்:
மாற்று மதத்தவரிடம் சென்று ஜோதிடம் பார்ப்பதுதான் ஹராம். ஆலிம்சாக்களிடம் சென்று 'அரபு ஜோஸ்யம்' பார்ப்பது, 'அப்ஜது' கணக்குப்படி வருங்காலத்தைக் கவனித்துக் கொள்வதும் தவறல்ல எனக் கூறும் தறுதலைகளையும் மலிவாகக் காண்கிறோம். மெய்யான குர்ஆன் - ஹதீஸ் செய்திகளை அறியாத நிலையில் மெத்தப் படித்த போலி ஆலிம்ஷாக்களிடம் சிக்கிப் பொருளோடு, மன அமைதியும் இழந்து திரிதலையும் காண்கிறோம். அன்றைய அரபிகள் வருங்காலத்தைக் குறித்து செயல்படுவதற்காக அம்பு எறிந்து குறி பார்க்கும் பழக்கத்தைக் கடைப்பிடித்து வந்தார்கள். குறி பார்ப்பதைத் திருமறையின் பல இடங்களிலும் கண்டித்துள்ள இறைவன், இறுதியாக நபி (ஸல்) அவர்களுக்கு வெளிப்படுத்திய திருவசனத்திலும் இச்செயலை ஹராம் என முத்திரை குத்திக் குறிப்பிட்டுள்ளான்.
'..அம்புகள் மூலம் நீங்கள் (குறி கேட்டுப்) பாகம் பிரித்துக் கொள்வதும் உங்கள் மீது விலக்கப்பட்டிருக்கின்றது.' (அத்தியாயம் 5 ஸூரத்துல் மாயிதா 3வது வசனத்தின் ஒரு பகுதி).
இணை வைத்திடும் நிராகரிப்பாளர்கள்:
குறிபார்த்தல் - ஜோதிடம் கேட்டல் முதலிய செயல்கள் இணை வைத்திடும் மாபாதகத்தைச் சார்;ந்ததாகும். இத்தகையவர்களுடைய தொழுகை போன்ற நல்லமல்கள் இறைவனால் ஏற்றுக் கொள்ளப்பட மாட்டா: இவர்கள் நிராகரித்தவர்களே யாவர், என நபி(ஸல்) அவர்கள் திருவாய் மலர்ந்தருளியுள்ளார்கள்.
'குறி பார்த்தல், வரை கோடுகள் மூலம் ஜாதகம் கணித்தல், பறவைகள் மூலம் குறிபார்த்தல், முதலானவை இணைவைத்தலாகும். (அறிவிப்பவர்: கபீஸா (ரலி), ஆதார நூல்: அபூதாவூது).
'எவரொருவர் ஜோதிடனை அணுகி, ஜோஸியம் கேட்டு (ஜோஸியன்) கூறியதை உண்மை எனக் கூறுவாரோ, அவருடைய நாற்பது (நாட்களின்) தொழுகைகள் ஏற்றுக் கொள்ளப்படமாட்டாது' என நபி(ஸல்) அவர்கள் கூறினார்கள். ஆதார நூல் முஸ்லிம்).
'பறவை சகுனம் பார்ப்பவன், பார்க்கக் கோருபவன், குறிபார்ப்பவன், குறிபார்க்கப் கோருபவன், சூனியக்காரன், சூனியம் பார்க்கக் கோருபவன், ஜோதிடன் கூறியதை உண்மைப் படுத்துபவன் ஆகியவர்கள் நபி(ஸல்) அவர்கள் மீது அல்லாஹ் இறக்கி வைத்ததை நிராகரித்தவர்களாவார்கள்.' (அறிவிப்பவர்: இம்ரான் பின் ஹுஸைன் (ரலி) தொகுத்தவர்: பஸ்ஸார் (ரஹ்).
இனிதே இயம்புக இன்ஷா அல்லாஹ்! :-
நாளை என்ன நடக்கும் என்பதை எந்த மனிதராலும் திட்டவட்டமாக எடுத்துக் கூற முடியாது. அதைப்பற்றிய பரிபூரண ஞானமும் அல்லாஹ் ஒருவனுக்கே உரியதாகும். அல்லாஹ் எவ்வாறு நாடுகின்றானோ அவ்வாறு தான் வருங்கால நிகழ்ச்சிகள் அமைய முடியுமேயன்றி, அவை மனித நாட்டத்துக்கு கட்டுப்பட்டவையல்ல.
'நபியே! எந்த விஷயத்தைக் குறித்தும், நிச்சயமாக அதை நான் நாளை செய்வேன் என்று கூறாதீர்!' அல்லாஹ் நாடினாலன்றி அது நடைபெறுவதில்லை' (அத்தியாயம் 18 ஸூரத்துல் கஹ்ஃபு 23 மற்றும் 24 ஆம் வசனங்களின் கருத்து) என்னும் பொருள் கொண்ட வசனங்களையும் அல்லாஹ் நம் சிந்தனைக்கு வைத்திருக்கிறான்.
முக்காலமும் அறிந்தவன் :-
இது வரை சொல்லப்பட்ட அனைத்தையும் உள்ளடக்கியதாகப் பினவரும் இறைவசனம் அமைந்திருத்தலைக் காணலாம்.
'நிச்சயமாக அந்த (யுக முடிவு) காலத்தைப் பற்றிய ஞானம் அல்;லாஹ்;விடமே இருக்கிறது, அவனே மழையையும் இறக்குகிறான், இன்னும் அவன் கர்ப்பங்களில் உள்ளவற்றையும் அறிகிறான். நாளைய தினம் தாம் (செய்வது) சம்பாதிப்பது எது என்பதை எவரும் அறிவதில்லை;: தான் எந்த பூமியில் இறப்போம் என்பதையும் எவரும் அறிவதில்லை. நிச்சய மாக அல்;லாஹ்; தான் நன்கறிபவன், நுட்பம் மிக்கவன். (அத்தியாயம் 31 ஸூரத்து லுஃமான் - 34வது வசனம்).
இதையறிந்து தெளிந்து, குறிகேட்டல் என்னும் இணைவைத்தலாகிய செயலிலிருந்தும் விடுபட்டு, அல்லாஹ்வுக்கும் நபி(ஸல்) அவர்களுக்கும் பொருத்தமான வாழ்க்கை வாழ்வதையே நமது குறியாக அமைத்துக் கொள்ள வல்ல அல்லாஹ் அருள்புரிவானாக!.
- மர்ஹும். அ. ஜமாலுத்தீன் எம். ஏ. எம்.ஃபில்.
பேராசிரியர், வக்ஃப் வாரியக் கல்லூரி, மதுரை